ا[الجزء الرابع]ا - الحلقة الثالثة عشرة

سارة: الطلاق دي كلمة، دي كبيرة اوي، ويتهز لها عرش الرحمن .. ومش محتاجة اقولك ان الست اللي تطلبها دون بأس تحرم عليها ريحة الجنة .. انا مش حادلعك اكتر من كده، ولا حاقولك مالك، بس اللي بتقوليه ده لا يصدق، ايه اللي ممكن يحصل بين اتنين في مدة ما تتجاوزش سنه عشان يقرروا ينفصلوا؟!!
اسراء: حازم ما قررش حاجة، ده قراري انا ولازم يوافق عليه .. انا ما تجوزتش عشان اعيش تعيسة ومتبهدلة وكمان بعيد عن اهلي ..
سارة: و الله ده كان اختيارك، انتي قلتي لماما وبابا بصريح العبارة كده بحبه ومش حاتجوز غيره، ولو ما تجوزتوش حافضل طول عمرى من غير جواز ..
اسراء: ده انسان ما عندوش ريحة الاحساس، ما فيش مشاعر خالص، فين الكلام اللي كان هاريني بيه ايام الخطوبة؟ فين "الأناشيد" اللي كان بيبعتهالي كل شويه على الموبايل؟ فين كلمة بحبك اللي كان يقولها في اول المكالمة و يختم بيها كمان؟ كل ده اختفى .. بقى انسان بشع كل همه الفلوس .. و حتى مرتبي بيخلينى احوشه كل شهر في حسابي وما يسمحليش اصرف حاجه .. وقال ايه اصل البلد هنا مغرية وممكن نصرف اللي بنكسبه واكتر، ونرجع يا مولاي كما خلقتني .. و الشقه اللي عايشه فيها خانقاني زيادة .. صحيح هيّا نضيفة و مفروشة كويس، لكن اوضه واحدة، يعني اخرج من اوضتي الاقي نفسي على باب الشقه خلاص ..!!
سارة: يا اسراء انا معظم صحباتي مسافرين اوروبا وكمان الخليج، واللي كلهم متفقين عليه ان الايجارات غالية جدا في البلاد دي، وبرضه الواحد ما عندوش ضيوف زي مصر ولا حاجه .. ايه احيتاجاتك يعني في الدنيا غير اوضة نوم و ترابيزة اكل وانتريه تقعدي عليه انتي و جوزك؟ و بعدين اللي تطلب الطلاق دي يبقى لا سمح الله جوزها بيخونها، بيستغلها، بيضربها .. لكن ده الراجل حتى فلوسك بيخليكي تحطيها في حسابك انتي، ليه بس البطر ده؟
انتي فاكره نفسك في مصر عايزه شقة اربع اوض وصالة؟ انتي نسيتى ان ماما هي اللي اصرت يكون ليكي شقة في مصر ان شالله ايجار و تتفرش قبل ما تمشي، و حضرتك كنتي مش عايزه حاجه غير حازم؟ وفين وفين لما سمعتي الكلام، ايه اللي غيرك دلوقتي؟ فين الحب العظيم؟ انهار عند اول مطب؟ دلوقتي بقت الشقق مهمة؟
اسراء: ماهو المصيبه ان الحب ما عادش موجود .. استحمل ليه بقة؟
سارة: انا مستغربه اوي يا اسراء، الحب ده يا ماما مش الكلام و الخروج و الفسح والتسبيل زى ما السينما بتصوره، الحب ده شعور عميق جواكي بتكنيه لبني ادم، وتفضلي حاسه بيه طول عمرك مهما حصل .. و بعدين تعالي هنا انتي عملتى ايه عشان تغذي الحب ده؟ حاولتي تمشى له خطوه يمكن يمشى هوه خطوتين؟
اسراء: انتي بتتكلمي ازاي؟ انا ليـّا كرامتي برضه .. حاتعملي زى ستي وستك بقه لما كانت تقعد متزوقه لجوزها و لابسه الى على الحبل، ومحضره العشاء و مستنياه؟!! اللي بيحبني يحبني زي ما أنا في اي حاله .. مش عشان عاملة في نفسي العمايل!
سارة: يوه .. جتك وكسه يا منيله .. انتي مش بتعملى العمايل؟ اتاري الراجل طهق منك وده عشان ايه؟ عشان كرامتك؟ ده كرامتك في انك تكوني زوجه صح، وحكاية الاكل دي مش النقطه انه ياكل، المهم انه يحس انك تعبتى نفسك و فكرتي هوه بيحب ايه وعملتيه عشانه .. و زينتك لجوزك دي حاجه ترفع قيمتك عنده وعند الله كمان .. و لا انتي شاطرة تتزوقي بس وانتي خارجه؟ طيب جربي تعملي العمايل كده و انتي تلاقى امير الرومانسيه معاكي في البيت ..
اسراء: هاهاها .. انتي سهل تقولي كده عشان متجوزه راجل مثالي ..
سارة: على فكره ما فيش حاجه اسمها راجل مثالي .. كل انسان فيه عيوب و ميزات، واكبر ميزه في عمر انه متدين وبيراعي ربنا في كل تصرف .. اما انا يا ستي ممكن احكيلك قصايد عن اللي كنت باعمله لعمر واحنا لسه في شهر العسل .. ده انا مره فرشت البيت كله ورد و حطيت اسهم على الارض تشير للاوضه اللي انا فيها عشان يحس انى مستنياه على نار .. هل فكرت في كرامتي بقه وقلت انا لسه في شهر العسل فلازم يكون عبد ذليل لجمالي و حلاوتي؟!! لا طبعا، بالعكس انا كبرت في عينيه اكتر واكتر ..
اسراء: بس انتي عمرك ما حكيتي ليـّا عن حاجة زى دي ..!
سارة: ايوه عشان دي اسرار بين الست و جوزها، لكن ربنا عالم اني باحكيلك الوقتي عشان غرضي خير .. نفسي تعرفي ان الحياه اللي انتي شايفاها ناجحة وبراقة من برة دي ياما تعبنا عشان نوصللها انا وعمر كمان .. انا برضه ليـّا عيوبي وهوا استوعبها، وقدرنا نمشـّي مع بعض الايام .. واهم حاجه كل واحد فينا يراعي ربنا يا اسراء .. انتي عارفه لما تقفي حتى تغسلي الاطباق وانتي موجهه نيتك لله، كده كده انتي حاتغسليهم، لكن اخلاص النيه ده هو سبب كل نجاح في الحياه ..
بصي يا اسراء، بابا دايما كان يقول ان سنه اولى جواز دي بتكون زى المكنه الجديده اللي لسه التروس فيها ما لانتش وما خدتش على بعضها وبتحتك ببعضها وبتعمل مشاكل، ومع الايام التروس بتنعم و بتلين والحياه بتكون احسن، بس لازم ندي نفسنا فرصة، انتي ما انكرتيش على جوزك لا خلق ولا دين، بس مجرد انه مش رومانسي، وعايز يعمل قرشين في غربته دي عشان يرجع و ينتهي من الهم ده، وده حقه..
اسراء: ما الناس حوالينا اهم عايشين حياتهم، و بيصرفوا باليمين والشمال وعربيات ايه وشوبنج ايه وفسح كل يوم ..
سارة: يا ريت ما تقارنيش نفسك بحد، دي اكبر مصيبه في الحياة، ظروفهم ممكن تكون مختلفة، ممكن يكونوا اكبر منك بكتير ولهم وضعهم في البلد مش زيكم لسه بادئين، ممكن يكونوا حايعيشوا فيها علطول، لكن اللي اعرفه ان حازم نفسه يبني نفسه عشان ترجعوا وتعملوا حاجه هنا في بلدكم .. اللي فهمته من حازم ان غربته دي مرحلة، عايز يعديها باقصى سرعة عشان يكون له مستقبل في بلده ..
اسراء: بس مش معنى كده ان احنا نموت هنا عشان نعيش بعدين ..
سارة: يعني ايه تموتوا؟ ما بتاكلوش مثلا؟
اسراء: لا مش كده، بس يا سارة انتي لو جيتي دبي حاتلاقي وهم حاجات ما شفنهاش في حياتنا .. نفسي اعيش الجو ده وانسى التحويش وانسى الفلوس وافتكر بس اني مع حبيبي ..
سارة: والله انا كنت بابقى سعيدة مع حبيبي واحنا في شقة خاله في اسكندرية اكتر من اي مكان في العالم .. اطلبي السعادة يا اسراء، اطلبيها من ربنا، واعملي اللي عليكي عشان توصليلها، وبعد كده ارمي اللوم على غيرك ..
اسراء: حاضر يا سارة، هاحاول، وخليكي معايا ارجوكي احسن انا فعلا حاسه بالوحده اوي اوي ..
سارة: انا معاكى على طول بقلبي وحادعي ربنا يوفقك وينور طريقك .. ويوم ما تعوزي تكلمينى ابعتيلي مسج بس ع الموبايل، في ثوانى اكون معاكى ع الشات، وبلاش الكلام ده تقوليه لماما عشان هي اي كلمه حاتسمعها بخصوص حازم حاتقولك علطولك مش قلت لك .. ارجعي بقه يا ختي وياريت بلاش تكسري مجاديف المسكين اخوكي بخصوص الحب و جواز الحب، العيب فينا احنا مش في الحب، بنتوقع حاجات كبيره و نبني امال جامده جدا على الحب ده، مع ان الحب ده مجرد شعور يكفي لبدايه موفقة، لكن مش لحياه كاملة موفقة، دي ربنا بس اللي يقدر يوفقنا ليها ..
اسراء: طيب هاجرب نصايحك يا ست الحكيمة، وان شاء الله نتكلم قريب ..

اشترت سارة كارت اتصال وكلمت حازم على الموبايل وهو في عمله، واوصته خيرا باختها، و طلبت منه ان يعطف عليها لكونها وحيدة في الغربة و تحتاج الى كل لمسه حنان منه ..
حازم: والله يا سارة انتي عارفه انا باحبها قد ايه، بس الشغل ما بيرحمش، والتفكير والضغوط مخليه الواحد فعلا قرب ينسى يعني ايه مشاعر، بس دي حاجات تتحس، لازم هيـّا برضه تحس بيـّا ..
سارة: ايوه يا حازم، انا عارفه انك بتحبها، لكن الكلمة الطيبه صدقة يا اخي، يعنى بدل ما الواحد يقول سلام عليكم، يقول سلام عليكم يا حبيبتي، مش حاتفرق كام حرف .. اسراء طول عمرها رومانسية وبتحبك موت، و انا متاكدة انك ممكن تاكل عقلها بكلمتين حلوين ..
حازم: هيـّا اشتكت لك من حاجه يا سارة ..
سارة: ابدا، انا بس حسيت في صوتها بالوحده والغربة وانها محتاجة قلب حنين .. انت عارف في كلمة كانت الفلاحة تقولها لجوزها زمان، تقوله ليلة الدخله: تركت اهلي و ملت لك، بالله عليك تعطف ع الغريب ..
وهي فعلا غريبة، وانت كمان، لكن انت الراجل اللي تقدر تحتوي مشاكل الغربة والبعد عن الاهل، ربنا يسمعنا عنكم خير يا حازم .. وبالمناسبة انا عارفه ان اجازتكم قربت، عايزين بقه نقضي اسبوع مع بعض كلنا عيله واحده في المصيف، ايه رايك؟
حازم: يا ريت والله، انا مش قادر استنى الاجازه تيجي .. لو حجزتم في مكان يا ريت تشوفولنا معاكم عشان نصيف كلنا .. وسلامي للباشمهندس عمر ..
سارة: هوه بيسلم عليك كمان يا حازم، مع السلامة ..

وبعد انتهاء المكالمة، دخلت سارة على عمر الغرفة ..
سارة: انا عايزه اكلمك في موضوع مهم جدا ..
عمر: عينينا يا ام يحيى ..
سارة: تسلم عينيك، لازم نبتدي نقدم ليحيى في المدارس ..
عمر: مدارس؟ هوه يحيى حايروح كام مدرسة؟
سارة: انا توقعت برضه انك ما عندكش فكره، بص يا سيدي، في تنسيق للمدارس عشان الاولاد يدخلوا كي جى وان، وامتحانات للقدرات، واختبارات للذكاء، ومقابلات شخصية ليه و لينا احنا كمان .. عشان كده لازم نقدم في اكتر من مدرسة، بس انت ادعي ربنا يوفقه و يتقبل في واحده منهم ..
عمر: و مين قال بس انى حادخله مدرسه ببلاش .. يا حبيبتي انا حاوديه مدرسه خاصه لغات، وبعدين قدرات ايه وبتاع ايه، انا ابني شديد شديد يعني ..
سارة: هاهاها، و انت فاكر كل ده عشان المدرسة ببلاش؟ ده الكلام ده بيحصل في المدارس الخاصة اللي مصاريفها شىء وشويات بس ..
عمر: يعني ادفع فلوس، وانا وابني نتبهدل اختبارات كمان؟
سارة: ده اللي بيحصل فعلا، وعشان الضغط الشديد على المدارس، ده المدارس الكويسه هي اللي بتعمل كده، وانت عارف اهم حاجه دلوقت ان الواحد يعلم ولاده احسن تعليم ممكن ..
عمر: طيب ان شاء الله على اول السنه الدراسيه نقدم و خلاص ..
سارة: يا عمر والله انت واخد المواضيع ببساطه زياده عن اللزوم .. احنا لازم نقدم من دلوقتي، ده حتى كده اتاخرنا .. وبعدين فيه حاجات تانيه لازم نعملها عشان حاتبقى كويسة في "السي في" بتاعت يحيى ..
غرق عمر في الضحك و هوه يردد "السي في"؟!! هاهاها هاهاها ..
سارة: بطل ضحك بقه، ده انت وانا لازم نكتب احنا خريجين كليات ايه ومدارس ايه، و مشتركين في انهي نادي، وكمان لازم نصيف السنة دي ان شاء الله في مارينا ..
عمر: مارينا؟؟؟

---- تنويه ----
ورد في هذه الحلقة والحلقة السابقة كلام حول ما يسمى بالـ"حب" قبل الزواج، ومثل هذا الكلام قد يشكل قناعة خاطئة عند الفرد المسلم بأن التعارف بين الشباب والفتيات قد يكون مشروعاً لأجل تشكيل مثل هذا الحب ليسبق الحياة الزوجيـّة ويكون بداية لحياة موفـّقة!! فنقول بأن هذا فهم مغلوط بل ومخالف للواقع، فلا يمكن لنظرة أو جلسة ينشأ عنها إعجاب، لا يمكن لها أن تكون أساساً للحبّ الحقيقي الذي يدعم رباط الزوجيـّة، فالحب الحقّ، لا الموهوم، بعيد عن أن يتشكـّل بمثل هذا، بل هو يتشكـّل بحسن العشرة مع الأيام .. وهذا الحبّ المتصوّر الذي يتوهمـّه الشخص قبل الزواج ليس سوى زبد فارغ، فلو كان معدناً أصيلاً لما رأينا حالات الخيانة المستشريـّة بين الأزواج في الغرب والذين لا يتزوجون إلا بعد معرفة طويلة جداً يحدث فيها ما يحدث مما تعرفون، ومن ثم بعد الزواج يختفي كلّ شيء!!
وإليكم هذا المقطع المرئي الذي فيه إحصاءات مفزعة لمن يملكون مثل هذه القناعة:
http://www.youtube.com/watch?v=owIEzfb4QsE
الحبّ شعور يـُخلق بعد المعاشرة، بعد أن تظهر صفات الطرفين حقاً بعد الزواج، فيقبل كلّ من الزوجين الطرف الآخر على عيوبه، ويحاول كلّ منهما أن يتخلـّص من عيوبه هذه ويدمج شخصيـّته مع شخصيـّة محبوبة في الصفات الإيجابيـّة والميـّزات التي يملكها .. وهذا لا يكون حقيقة إلا بعد أن يجمع سقف واحد الزوجين ويكونان سوياً مع بعضهما ليل نهار ..